Төрийн өмчид компаниудын дарга нарыг төсвийн мөнгөөр автомашин унаж тансаглахыг хатуу хориглосон хууль хэрэгжиж байгааг “Эрдэнэс Оюутолгой” ХК-ийн гүйцэтгэх захирлын үүрэг гүйцэтгэгч Э.Ганхүү мэдээгүй бололтой.

Тодруулбал, Төрийн хэмнэлтийн тухай хуульд “Энэ хуулийн зорилт нь төр, түүний бүх шатны байгууллага, нийтийн алба, тэдгээрийн үйл ажиллагаанд санхүүгийн сахилга батыг мөрдүүлж, ил тод байдлыг хангах, үр ашгийг нэмэгдүүлэх, үрэлгэн байдлыг хязгаарлах, хяналт тавихтай холбогдсон харилцааг зохицуулахад оршино” гэсэн бол 6.1.Улсын Их Хуралд ажлаа шууд хариуцан тайлагнадаг байгууллагын тэргүүн дэд, дэд, орлогч дарга болон дэд сайд, яамны төрийн нарийн бичгийн дарга, Засгийн газрын агентлагийн дарга, төрийн болон орон нутгийн өмчит хуулийн этгээдийн захирал, төсвийн байгууллагын дарга хот дотор албан тушаалын суудлын автомашин ашиглахыг хориглоно, 6.3.Энэ хуулийн 3.1-д заасан этгээд орон нутагт албан томилолтоор, хуульд заасан эрх бүхий этгээд газар дээрх хяналт шалгалтаар ажиллахад хувийн хэвшлийн аж ахуйн нэгж, эсхүл төрийн болон орон нутгийн өмчийн автотээврийн байгууллагаар үйлчлүүлэхээс бусад тохиолдолд автомашин ашиглахыг хориглоно” гэж тус тус заасан байдаг.

Гэтэл бурхангүй бумба галзуурна гэгчээр Засгийн газрын түр зөвшөөрөлтэй ирсэн Э.Ганхүү гэгч эмэгтэй ард түмний мэдлийн мөнгийг унаа тэрэгэнд зориулж, тухтай сайхан явах гэнэ. Жишээ нь 2024 оны 07 сарын 02-ний өдөр 270 сая төгрөгөөр 2023 онд үйлдвэрлэгдсэн, туулах чадвар сайтай, долоон хүний суудалтай тээврийн хэрэгсэл авах тендер зарласан байна.

Төрийн хориглосон хуулийг ТҮР ОРЛОН ГҮЙЦЭТГЭГЧ зөрчих нь Монгол улсад хууль гэж ойлгогдсоор өдийг хүрчээ. Энэ мэтээр төрд дэрсэлж, Засагтайгаа заргалдаж суугаа дарга нарт хатуу хариуцлага тооцох нь зүйтэй юм.