Манай редакц руу иргэн Б.САРАНЦЭЦЭГ холбогдсон билээ. Тэрээр нөхрөө авто ослоор алдаж 4 хүүхэдтэйгээ үлдсэн өрх толгойлсон ээж. Хотод ирж суурьшаад 4 жил болж байгаа тэрээр иргэн бүрд олгодог 0.07га газрын асуудлаа хөөцөлдсөн ч авч чадаагүй айлын хашаанд амьдарч байгаад хөөгдөн аргагүйн эрхэнд шар усны аманд буужээ. Харьяа хорооноосоо халамжийн тусламж авч үзээгүй тэрээр хүүхдийн мөнгө болон тэжээгчээ алдсаны тэтгэмжээрээ хоол хүнсээ болгодог гэлээ. Халууны улирал ирэхийн цагт тэрээр энэ газраасаа нүүх шаардлагатай байгаа тул Монголын ард түмнээсээ хашаатай болгож өгөхийг гуйлаа.