Өнөөдөр “Цусны донорын дэлхийн өдөр” тохиож байна. Жил бүрийн 06 дугаар сарын 14-ний өдрийг дэлхийн орнууд цусаа хандивлаж, бусдад амьдрал бэлэглэгч иргэд, байгууллага хамт олныг алдаршуулахад чиглэдэг байна. Монгол Улс энэхүү түүхт өдрийг тэмдэглээд 20 дахь жилдээ болж байгаа ажээ. Цус судлалын Үндэсний төвөөс тэмдэглэлт өдрийг “Амьдрал бэлэглэсэн 20 жил, цусны донор танд баярлалаа” уриан дор зохион байгуулж, хүн ардынхаа эрүүл мэндийг сайжруулахад үнэтэй хувь нэмэр оруулсан иргэд, байгууллагад талархал дэвшүүллээ.

Талархлын энэ өдөр Зэвсэгт хүчний Хуурай замын цэргийн командлалыг “Донор хамт олон”-оор зарлаж, өргөмжлөлийг тус командлалын Удирдлага төлөвлөлтийн хэлтсийн дарга хурандаа Д.Өлзийбаярт гардуулан өгсөн юм. Өргөмжлөлд “Сайн дурын, авлагагүй цусны донорын эгнээг өргөжүүлэх, цус, цусан бүтээгдэхүүний байнгын нөөцийг бүрдүүлэх, сая сая хүний эрүүл мэнд, амьдралын чанарыг дээшлүүлэх, алтан амийг аврах ариун үйлсийн төлөө тогтвортой хамтран ажиллаж ирснийг үнэлэн “Донор хамт олон”-оор өргөмжлөв” гэжээ.