УИХ-ын гишүүд ЦАЛИН ХӨЛС, УТАС, УНААНЫ зардлаасаа гадна УУЛЗАЛТ ЯРИА, ИДЭХ ХООЛНЫ ЗАРДЛАА ХҮРТЭЛ ТӨРӨӨС ДААЛГАДАГ болох нь. Тухайлбал Хэнтий, Дорнод, Сүхбаатар аймгууд буюу зүүн бүсээс сонгогдсон МАН-ын таван гишүүн, /Ерөнхий сайдаас бусад/ АН-ын нэг гишүүнтэйгээ нийлээд орон нутагт уулзалт хэлэлцүүлэг хийж явахдаа ХООЛНЫХОО ЗАРДЛЫГ татвар төлөгчдөөс гаргуулсан байх нь анхаарал татна.

БАРИМТ: 2024 оны 12 дугаар сарын 17-ний өдөр Хэнтий аймгийн Засаг дарга Д.Аюурбунь А/663 тоот “Уулзалт хэлэлцүүлэг зохион байгуулахад хөрөнгө зарцуулах тухай” захирамжаар 4 сая 284 мянган төгрөгийг “Бүсчилсэн хөгжлийн хөтөлбөрийг хэрэгжүүлэх ажлын хүрээнд УИХ-ын гишүүд болон сумдын Засаг дарга нарын хамтарсан уулзалт хэлэлцүүлэг зохион байгуулах” гэсэн утгаар зарлагадсан байна.

Ингэхдээ УИХ-ын гишүүдийг оролцуулсан 40 хүний өдрийн хоолонд 1 сая 726 мянган төгрөг, 40 хүний оройн хоолонд 2 сая 558 мянган төгрөгийг тус тус зарцуулжээ.

УИХ-аас “ТӨСВИЙН ХЭМНЭЛТИЙН ТУХАЙ” хууль батлан, Засгийн газар “Төрийн хэмнэлтийн 43-р тогтоол” зэргийг хэрэгжүүлж, сайд дарга нарыг хооллох, бэлэг дурсгал өгөх, найр наадам хийх зэргээр ТӨСВИЙН МӨНГИЙГ хэрэггүй зүйлд зарцуулахыг хориглосон.

Цагаан дээр хараар бичиж, цаашдаа ч хэлбэрэлтгүй дагаж мөрдөх хуулийг Хэнтий аймгийн Засаг дарга зөрчиж, төсвөөс цалинжиж, унаа, утас, зөвлөх, туслахынхаа цалинг гаргуулдаг ГИШҮҮДИЙГ ХООЛЛОСОН нь хууль дээгүүр гишгэсэн үйлдэл гэж дүгнэж болох юм.