Улиран одож буй 2024 онд Монгол улсын нийгэм, эдийн засаг, улстөр, геополитик бүхий л салбарт эрс өөрчлөлт, өсөлт гарсан томоохон бодлого шийдвэрүүд өрнөлөө. Эдгээрээс оны онцлох улстөрч, онцлох үйл явдал, оны онцлох шийдвэрүүдийг тоймлон хүргэж байна.

Жинхэнээсээ ХОТ УДИРДАХ ЭРХЭЭ БАТАЛГААЖУУЛСАН НИТХ-ын төлөөлөгч Хишгээгийн НЯМБААТАР

Өнгөрөгч 2024 оны хувьд Монголын улстөрийн дотоод нөхцөл байдал тайван байв. Харин улстөрчдийн хувьд зоригтой, хоригтой олон шийдвэр гаргаж, иргэдийн эгдүүлэл дургүйцэл, санал дэмжлэгийг авч чадсан нь Нийслэлийн Засаг дарга бөгөөд Улаанбаатар хотын захирагч Хишгээгийн Нямбаатар байв.

Хойноос ирээд хот манайх, хотонд ороод хонь минийх гэгчээр НАМЫН ДАРГЫН ДААЛГАВАРААР хотын дарга болсон Х.НЯМБААТАРЫН засаглалын үед олон жил гацсан түгжрэлийг бууруулах  “МЕТРО” төсөл, эрчим хүчний дутагдлыг арилгах “ЭРЧИМ ХҮЧНИЙ ЭХ ҮҮСВЭРҮҮД”, гэр хорооллыг орон сууцжуулах “СЭЛБЭ ДЭД ТӨВ” зэрэг нийтийн эрх ашигт хэтдээ тустай томоохон төслүүдийг хөдөлгөнө гэдгээ мэдэгдэж, ТЭЗҮ, зураг төсвийг нь гаргаж, улмаар бүтээн байгуулалтын ажлыг эхлүүлж, худалдан авах ажиллагааны тендерийг зарлав.  Мөн тэрбээр нийтийн тээврийн салбарт автобусны парк шинэчлэл хийж, Улаанбаатар хотын автозамуудыг шинэчилж засварлаж ажлыг эхлүүлэв. Хотын иргэд түгжирдэг замдаа ядаж машин тэрэгээ эвдэж сүйтгэхгүй байх боломжийг бүрдүүлсэн юм.

Энэ мэт богино хугацаандаа иргэдийн бухимдлыг төрүүлсэн ч хэтдээ хотын иргэдийн амьдралд тустай томоохон төслүүдийг хэрэгжүүлж, “20 минут”-ын дотор иргэд төрийн үйлчилгээг авах боломжийг бүрдүүлнэ хэмээн багаа удирдан орон нутгийн сонгуульд орж 90 хувийн амжилттай оролцов. НИТХ-ын 45 төлөөлөгчөөс сонгуулийн 40 төлөөлөгчөө ялуулж, ирэх дөрвөн жилд хийж хэрэгжүүлэх ажлынхаа арын багийг баталгаатай болгож, багаа удирдан ялалтад хүрсэн нь түүний хувьд ОНЦЛОХ шалтгаан байв. Ингээд шинээр бүрдсэн НИТХ-ын анхдугаар хуралдаанаар Нийслэлийн Засаг даргаар дахин сонгогдож, “иргэдийн өгсөн итгэл, ялалтыг бодит ажил болгоно. Энэ ХААН СОНГОЛТЫГ бид дангаараа эзэмшинэ. Бусад намтай эвсэж, хувьсаж нялцганахгүй” хэмээн байр сууриа товч, тодорхой илэрхийлсэн юм.