Улиран одож буй 2024 онд Монгол улсын нийгэм, эдийн засаг, улстөр, геополитик бүхий л салбарт эрс өөрчлөлт, өсөлт гарсан томоохон бодлого шийдвэрүүд өрнөлөө. Эдгээрээс оны онцлох улстөрч, онцлох үйл явдал, оны онцлох шийдвэрүүдийг тоймлон хүргэж байна.

Анхны 126 гишүүнтэй парламентын ангийн дарга Дашзэгвийн АМАРБАЯСГАЛАН

Монгол Улсын Их хурлын 2024 оны 06 дугаар сарын 05-ний өдрийн 64-р тогтоолоор “Монгол Улсын бүсчилсэн хөгжлийн үзэл баримтлал”-ыг баталсан болЗасгийн газраас 2024 оныг “Бүсчилсэн хөгжлийг дэмжих жил” болгон зарласан.  Энэ дагуу УИХ-ын ээлжит сонгуульд улс орон даяар анх удаагаа “БҮСЧИЛСЭН” хэлбэрээр, тойргийн болон жагсаалтын хольмог тогтолцоогоор явагдав. Сонгуулийн үр дүнд Монгол ардын нам 68 суудал авсан бол сөрөг хүчин Ардчилсан нам 42 суудал, гурав дагч хүчин ХҮН нам 8, бусад жижиг намуудын төлөөлөл “Үндэсний эвсэл”, “Иргэний Зориг ногоон нам” тус бүр дөрвөн гишүүнтэй болж олон намын төлөөлөл бүхий 126 гишүүнийг бүрдүүлэв.

Хуулийн дагуу олонх болсон нам УИХ-аа даргална. Эрх баригч намын дотор шинэ парламентаа хэнээр удирдуулах вэ гэсэн марафон эхэлсэн. Олон нийтийн зүгээс УИХ-д олон сонгогдсон гишүүдээс УИХ-ын дарга тодорно гэсэн хүлээлт байсан ч МАН-ын Ерөнхий нарийн бичгийн дарга, Монгол Улсын Засгийн газрын Хэрэг эрхлэх газрын даргаар ажиллаж байгаад УИХ-ын сонгуульд “БАРУУН БҮС”-д МАН-аас нэр дэвшиж ялалт байгуулсан ДАШЗЭГВИЙН АМАРБАЯСГАЛАНГ парламентаа удирдуулахаар МАН-ын бүлэг шийдвэр гаргав. Ингэснээр НИТХ-ын төлөөлөгчөөр дөрвөн жил, МАН-ын генсекээр долоон жил, Хэрэг эрхлэхийн даргаар нэг жил гаран ажилласан шинэхэн улстөрч Д.АМАРБАЯСГАЛАН ийнхүү 2024 оны 06 дугаар сарын сүүлчээр ШИНЭЭР БҮРДСЭН 125 ГИШҮҮНТЭЙ парламентын ангийн дарга болж, алх цохих, асуулт таслах, гишүүдээ загнах, хонь хурга нийлсэн шиг шуугилдах парламентын танхимын учрыг олж, хужрыг тунгаах хүндтэй албанд ийнхүү тохоон томилогдсон нь монголын улстөр дэхь ОНЦЛОХ ҮЙЛ ЯВДАЛ болов.