Сонгинохайрхан дүүргийн иргэдийн Төлөөлөгчдийн Хурлын дарга бөгөөд Гэмт хэргээс урьдчилан сэргийлэх ажлыг зохицуулах салбар зөвлөлийн дарга Б.Золбоо Сонгинохайрхан дүүргийн цагдаагийн гуравдугаар хэлтэст ажиллалаа.

Энэ үеэр тус цагдаагийн хэлтсээс 2025 оны нэгдүгээр улирлын гэмт хэргийн гаралт шийдвэрлэлтийн талаар мэдээлэл өглөө. Сонгинохайрхан дүүргийн цагдаагийн 3-р хэлстийн хувьд дүүргийн 12 хороог хамран үйл ажиллагаа явуулж, оны эхний улирлын байдлаар гэмт хэргийн илрүүлэлтээр тэргүүлсэн үзүүлэллтэй байгаа аж. Мөн урьдчилан сэргийлэх, архидан согтуурахтай тэмцэх чиглэлээр гэр бүлийн хүчирхийллийн 104 мэдээлэл дуудлагыг хүлээн авч, 20 иргэнийг архины албадан эмчилгээнд хамруулахаар болжээ.

Иргэдийн Төлөөлөгчдийн Хурлын дарга бөгөөд Гэмт хэргээс урьдчилан сэргийлэх ажлыг зохицуулах зөвлөлийн даргын зүгээс урьдчилан сэргийлэх арга хэмжээг сайтар авах, сар бүр тоон мэдээлэллийг гарган дүн шинжилгээ хийж ажиллахыг санууллаа. Хамгийн гол нь гэмт хэрэг үйлдэгдсэн хойно биш, өмнө нь урьдчилан сэргийлэх ажил чухал байгааг онцолсон юм.

2023 онд дүүргийн иргэдийн Төлөөлөгчдийн Хурлаас Б.Золбоо даргын хувьд төлөөлөгчөөр ажиллаж байхдаа санаачлан ажлын хэсэг байгуулж цагдаагийн хэлтэстэй хамтран ажилласны үр дүнд 1-р хорооллын “олон буудал” нэртэй газруудын үйл ажиллагааг зогсоож байсан юм. Тухайн бүсэд 2024 онд гэмт хэрэг, зөрчлийн дуудлага огт бүртгэгдээгүй талаар мэдээлэл өгсөн юм.

Сонгинохайрхан дүүргийн нутаг дэвсгэр дэх Саппоро орчим нь биеэ үнэлэлт, архидан согтуурах гэмт хэргийн гаралт их, иргэдийн эрүүл аюулгүй орчинд амьдрах эрхэнд нөлөөлсөн асуудал их дагуулдаг болоод удаж буй. Тус байдлыг арилгахаар үе шаттай арга хэмжээ зохион байгуулж эхэлсэн байна. Арга хэмжээний хүрээнд тус нутаг дэвсгэр дэх биеэ үнэлэлт, архидан согтуурах үйл ажиллагааг цэгцлэхээр төлөвлөжээ.