Дэлхийн үлгэрийн хаан Дани улсын алдарт хүүхдийн зохиолч Х.К.Андерсений төрсөн өдрөөр Олон улсын хүүхдийн номын баярыг 1967 оноос эхлэн дэлхий нийтээрээ тэмдэглэсээр ирсэн. Ном уншиж, найз нөхөддөө ном бэлэглэж, номын тухай ярилцаж дотносдог, мэдлэгээ хуваалцдаг энэ өдрийг Хүүхдийн төв номын сангийн хамт олон 21 жилийн турш уламжлал болгон бяцхан уншигчидтай хамт тэмдэглэн өнгөрүүлдэг билээ.

Энэ жилийн хувьд 200 гаруй хүүхэд багачууд цугларч тоглож наадан, хүүхдийн зохиолчидтой уулзан танилцаж, хүүхдүүдийн Х.К.Андерсений үлгэрээр сэдэвлэн бүтээсэн гар зургийн болон бүтээлийн үзэсгэлэн, урлагийн тоглолтыг үзэж сонирхлоо. Х.К.Андерсений гайхамшигт зохиолуудыг шимтэн уншиж бүтээл хийж авчирсан хүүхдүүдэд хүүхдийн номын зохиолчид гарын үсэгтэй номоо гардуулж, Хүүхдийн төв номын сангийн зүгээс соёлын бэлгээр урам өглөө.