Экологийн цагдаагийн албаны Эрүүгийн цагдаагийн хэлтэс, Мөрдөн байцаах албаны Хүрээлэн буй орчны эсрэг гэмт хэрэг мөрдөн шалгах хэлтсийн алба хаагчид Сүхбаатар дүүргийн 11 дүгээр хороо Хангай хотхоны хажууд 2020 оны 03 дугаар сарын 05-ны өдөр цацраг идэвхит бодисын өндөр агууламжтай “Луна” нэршилтэй НЭГ  килограмм химийн бодисыг худалдахаар тээвэрлэж явсныг илэрүүлэн таслан зогсоолоо.

Монгол улсын иргэн П, Б, Д, Н, А нар бүлэглэн цацраг идэвхит бодисын өндөр агууламжтай химийн бодисыг худалдахаар суудлын тээврийн хэрэгсэлд бодисыг хадгалж байсныг тогтоож гэмт этгээдүүдийг баривчлан, хойшлуулшгүй ажиллагааны хүрээнд Мөрдөн байцаах албаны Хүрээлэн буй орчны эсрэг гэмт хэрэг мөрдөн шалгах хэлтсээр хэргийн газрын үзлэг хийж, гадуураа төмөр хайрцагтай, шилэн савалгаатай, химийн бодисыг эд мөрийн баримтаар хураан авч Онцгой байдлын ерөнхий газрын Гамшгаас хамгаалах шуурхай удирдлагын газарт хүлээлгэн өгч мөрдөн шалгах ажиллагаа явуулж байна.