МҮХАҮТ, Монголын бизнесийн зөвлөл, Монголын банкны холбоо, Улаанбаатар хотын худалдааны танхим болон хувийн хэвшлийнхэн өнөөдөр  COVID-19-ийн нөхцөл байдалтай холбоотойгоор хуралдаж, мэдээлэл хийсэн билээ. Энэ үеэр Монголын банкны холбооны гүйцэтгэх захирал Л.Амар “Иргэд болон бизнес эрхлэгчдийн зүгээс хүлээлт өндөр  байна. Банкны зээл нь бизнес эрхлэгчдийн 60 гаруй хувьд хүндрэл учруулж  буй судалгаа гарсан байсан. Банкуудын холбоо энэ талаар идэвхтэй ажиллаж, төр засгийн удирдлагуудтай уулзаж байна. Тухайлбал, Монголбанктай хоёр, гурав уулзаж, эхний байдлаар нааштай хариу авлаа.

Хүндрэлтэй зүйл нь тухайн зээлийнх нь бүтцийг өөрчиллөө гэхэд тодорхой шаардлагууд Монголбанк, Сангийн яамны хамтарсан тушаалаар тавигддаг.

Уг шаардагын хүрээнд сангуудыг нь байгуулна. Өөрөөр хэлбэл,  банкуудын хувьд зардал нэмэгдэнэ. Мөн зээлдэгчдийг бүтэц өөрчллөгдсөн зээл гээд Монголбанкны зээлийн мэдээллийн санд мэдээлнэ гэх мэтчилэн  хүндрэлтэй нөхцөл байдал үүсдэг. Иймд энэ асуудлыг шийдвэрлүүлэх зорилгоор Сангийн яам, Монголбанканд журмынхаа заалтыг тодорхой хугацаанд түдгэлзүүлэх, хойшлуулах хүсэлт тавьсан.  

Банкны салбарт 55 хууль, 69 журмын хүрээнд хязгаарлалтууд тавигдсан байдаг.

Олон улсын байдлаас харвал Засгийн газар болон, Төв банкуудын зүгээс арга хэмжээнүүд авч байгаа учраас манай Засгийн газар энэ чиглэлд ажиллах нь зүйтэй гэдэгт МҮХАҮТ-тай санал нэг байна” гэлээ. Мөн тэрбээр Сангийн сайдын ярьсан шиг бус харин ч эсрэгээрээ эдийн засаг сэргэхгүй байх төлөвтэй байгаа гэв. Тэд ҮАБЗ-ийн шийдвэрийг хүлээж байгаа юм байна.