2020 оны УИХ-ын сонгууль хаяанд ирээд буй билээ. Бие даан нэр дэвших иргэд 801 хүний гарын үсэг цуглуулах үйл ажиллагаа хоёр хоногийн өмнөөс эхэлсэн. Эдгээр бие даан нэр дэвшигчдийн нэрс дунд “Exclusive” компанийн захирал Г.Майцэцэг байсан. Гэвч өнөөдөр тэрээр бие даан нэр дэвшихээс татгалзаж буйгаа илэрхийлж мөрийн хөтөлбөрөө татаж байна. Тэрээр Үндэсний аудитын газар гаргасан хүсэлтэндээ:

“Иргэн Г.Майцэцэг миний бие 2020 оны УИХ-ын сонгуульд бие даан нэр дэвших хүсэлт гарган мөрийн хөтөлбөрөө Үндэсний аудитын газар шалгуулахаар өгсөн. Гэвч миний бие өөрийн хүсэлтээр бие даан нэр дэвшихээс татгалзаж мөрийн хөтөлбөр буцаан авч байна. Учир нь дэлхий дахинд нүүрлээд буй цар тахлын үед монгол улсын иргэн сонгуульд нэр дэвших эрхээ онц байдлын үед хязгаарлагдмал эдлэх учир энэхүү сонгууль нь цаг үеээ олоогүй. Мөн өөрийн мөрийн хөтөлбөрөө танилцуулахад олон саад бэрхшээл гарах учир нэр дэвшихээс татгалзаж байна хэмээн энэ өргөдлийг өгч байна” гэжээ.

Дээрх шалтгааны улмаас “Exclusive” компанийн захирал Г.Майцэцэг 2020 оны УИХ-ын сонгуульд бие даан нэр дэвшихгүй болсноо зарлалаа.