Дорнод аймгийн төв Хэрлэн сум /Чойбалсан хот/, Баянтүмэн сумдад Зөвлөлт холбоот Улсын Цэргийн анги нэгтгэлүүд байрлаж байсан суурин газрууд, хээрийн сургуулилт хийж байсан 4 том талбайд сум, тэсрэх дэлбэрэх зүйлсийг эрэн хайх, устгах ажлыг аймгийн Засаг даргын А/301 дүгээр захирамжаар ажлын хэсэг байгуулан 5 дугаар сарын 25-ны өдрөөс 6 дугаар сарын 05-ны өдөр хүртэл 10 хоногийн хугацаанд зохион байгууллаа.

Сум, тэсрэх дэлбэрэх зүйлсийн хайгуул, устгалын ажлыг өндөр түвшинд зохион байгуулж иргэдийн эрүүл аюулгүй орчинд амьдрах нөхцөлийг бүрдүүлэхэд хувь нэмрээ оруулан, мэргэжлийн ур чадвараа дайчлан онц төвөгтэй ажил үүрэг гүйцэтгэсэн нэр бүхий 16 албан хаагчдыг аймгийн Засаг дарга бөгөөд аймгийн Батлан хамгаалах газрын дарга М.Бадамсүрэнгийн санаачлагаар талархал илэрхийлж мөнгөн шагналаар урамшуулсаныг өнөөдөр гардуулан өглөө.

Энэхүү ажилд Зэвсэгт хүчний 327-р анги АЗДТГ-ын Цэргийн штаб, Тагнуул, Цагдаагийн газар, Бүсийн төв Онцгой байдлын газар, Дотоодын цэрэг, Газрын харилцаа, барилга хот байгуулалтын газар, БСУГ-ын нийт 40 гаруй албан хаагч ажиллаж нийт 3830 ширхэг сум, тэсэрч дэлбэрэх зүйлийг эрэн хайж устгасан юм.