Г.Занданшатарын тэргүүлж буй парламентад онцгой гавьяа байгуулсан цөөн хэдэн түшээ бий. Тэдний нэг бол Баянхонгор нутгийн хүү, Эрдэнэтээс нэр дэвшин сонгогдсон УИХ-ын гишүүн Сайнхүүгийн Ганбаатар юм. Иргэдийн тэтгэврийг нэмэгдүүл, хөдөлмөрчдийн ЦАЛИНГ НЭМ хэмээн үйлдвэрчний Ерөнхийлөгч байхдаа гудамжнаас тэмцэж, жагссаар байгаад олонд танигдсан нэгэн. Тэмцэж буй үйлдэл бүхэн нь ЗӨВ ЗҮЙЛИЙН ТӨЛӨӨ байдаг болохоор ард түмэн түүнийг дэмждэг ч байж мэдэх юм. Алдарт Оюутолгойн гэрээ, хэлэлцээрийг байгуулагдсан цагаас нь л алдаатай, хуудуутай, Монгол улсад ашиггүй болсон хэмээн үе үеийн шийдвэр гаргагчид, эрх мэдэлтнүүдтэй ширүүхэн үзэлцэж, улмаар боловсролгүй, харанхуй бүдүүлгээрээ дуудуулах болсон. Гэхдээ чанга улстөрч гэдгээ харуулж АН-ын Засгийн газрын тэргүүн Ч.Сайханбилэгийг чичрүүлж, буланд шахаж байсан нэгэн. 2017 оны төрийн тэргүүний сонгуульд ч хүчтэй нэр дэвшигч гэдгээ нотолсон. Тэрээр энэ парламентын гишүүдийн бас нэг ЧИМЭГ БОЛЖ БАЙГАА. Оюутолгойн гэрээг нэн даруй цуцла, Монголын төр их хэмжээний өрөнд орчихлоо гэсэн агуулга бүхий лоозонг барьж Д.Сүхбаатарын нэрэмжит талбайд УЛСТӨРИЙН ӨЛСГӨЛӨН ЗАРЛАЖ, олон хоног суулт зарласны үр дүнд Л.Оюун-Эрдэнийн Засгийн газар, УИХ дахь түр хорооныхон хөрөнгө оруулагч талын төлөөлөлтэй удаа дараагийн уулзалт хийж ДУБАЙН ГЭРЭЭГ ЦУЦЛУУЛАХ арга хэмжээг авч чадлаа. Ерөнхий сайд асан Ч.Сайханбилэгийн хэлсэнээр олноо “БОСОО” хэмээн алдаршсан С.Ганбаатар дан ганц Оюутолгойн гэрээг цуцлуулахын төлөө тэмцээгүй. Тэрбээр одоогийн эрх баригч МАН-ынханыг зад шүүмжилж, алдаа оноог нь ил цагаан хэлснээрээ бүлгийн дарга Д.Тогтохсүрэнгийн араанд зуугдчихаад байгаа. Тэрбээр “МАН-ынхан бүгд хахууль авчихсан байна” гэж хэлсэн нь бүдүүн бүлгийн дарга хүнд туссан бололтой. Ганц дайчин ганцаардахгүй гэдэг үгийг Босоо Ганбаа гишүүн батлан харуулж байна.

Монгол Улсын нийт хүн амын 50 орчим хувь нь оршин суудаг нийслэл Улаанбаатар хотын 35 дахь Засаг даргаар ажиллаж буй Долгорсүрэнгийн Сумъяабазарыг бид онцолж байна. Хүн амын төвлөрөл, ажилгүйдэл, ядуурал, тулгамдсан асуудал ихтэй Сонгинохайрхан дүүргээс гурвантаа УИХ-д сонгогдсон тэрбээр Нийслэлийн Засаг дарга болоод бүтэн жил болов. Энэ хугацаанд нийслэлийн иргэдийн эрүүл аюулгүй орчинд амьдрах эрхийг бүрдүүлэх, коронавирус цар тахлаас иргэдээ хамгаалах, төрийн албаны хүнд суртлыг арилгах, хөгжлийн гацаа болон замын гацааг арилгах зэрэг олон ажилд анхаарал хандуулжээ. Олон жил яригдсан “Нийслэл Улаанбаатар хотын эрх зүйн байдлын тухай” хуулийг батлуулахын тулд зоригтой алхам хийж, өөрөө УИХ-аар батлуулав. Тэрчлэн нийслэлийн гол түгжрэл болсон “ХОТЫН ЗАМЫН ТҮГЖРЭЛ”-ийг УИХ, Засгийн газрын түвшинд хүргэн, шийдэх гарц гаргалгааг олов. Засгийн газраас хотын түгжрэлийг шийдэх 420 тэрбум төгрөгийн санхүүгийн эх үүсвэрийг батлуулсан нь хотын даргын бас нэг онцлох шийдвэр, нөлөөлөл байв. Тэрчлэн хот бизнес эрхлэгчдээ хорьж цагддаг, хавчиж гадуурахдаг бус харин дэмжин тусалдаг, хамтраад ажиллаж болдог гэдгийг олон зүйл дээр харуулж, улстөрийн манлайлал харуулав. Хотын өмнөх удирдлагуудынхаа хийж хэрэгжүүлсэн зөв зүйлийг зоригтойгоор үргэлжлүүлж, бурууг нь хуулийн хүрээнд таслан хязгаарлаж, ХУУЛЬ ХЭРЭГЖДЭГ, НОРОМ СТАНДАРТ МӨРДӨГДДӨГ гэдгийг тушаал шийдвэрээрээ үлгэрлэв. Хамгийн сүүлд л гэхэд хотын иргэд ямар нэг үйлчилгээ, аж ахуй эрхлэхдээ тусгай зөвшөөрөл шаардалгүйгээр бизнесээ эхлүүлж болох түүхэн шийдвэрийг гаргав. Ингэснээр төрийн хяналт шалгалт, татвар татаас, элдэв хүнд суртал, ашиг хонжоо хайдаг үйлдлийг хязгаарлаж, эрх чөлөөт, ардчилсан байдлын нэг шаардлагыг хангах чухал алхамыг нээлээ