Ямар ч дүрэмгүй, эмх замбараагүй хотод С.Амарсайхан хотын дарга байхдаа СТАНДАРТ ТОГТООХ  гэж оролдсон. Ингэхдээ “Нэг хот Нэг стандарт” хөтөлбөр хэрэгжүүлж “Хотын стандарт, орчны аюулгүй байдлын хяналт, зохицуулалтын газар”-ыг байгуулсан. Гэвч тэр цагаас хойш өнөөг хүртэл хот стандартгүй хэвээр л байгаа. Дарга солигдоод бүтэн дөрвөн жил өнгөрчихөөд байхад бахь байдгаараа л. Хотын дарга Д.СУМЪЯАБАЗАР гэнэт сэрсэн юм шиг тушаал гаргаж СТАНДАРТЫН ЗӨВЛӨГӨӨН ЗОХИОН БАЙГУУЛАХ шийдвэр гаргав.

2019 оноос хойш мөрдүүлж чадаагүй стандартыг 2023 онд мөрдүүлнэ гэдэг бүтэхгүй ажил. Хотын даргын хоёр орлогчийн ахалсан зөвлөгөөнийг зохион байгуулахын тулд татвар төлөгчдийн 159 сая төгрөгийг зарлагадсан байна. Гэтэл хотын иргэд хорт утаанд угаартаж, хальтиргаатай замд бэртэж байхад “ИРГЭДИЙН ЭРҮҮЛ АЮУЛГҮЙ ОРЧИНД АМЬДРАХ ЭРХИЙГ ХАНГАХ” зорилгоор 22 бүлэг бүхий 94 төрлийн стандартыг бэлтгэсэн байна. Түүнчлэн 114 саяар стандарт норм дүрмийн судалгааг 2022 онд хийж гүйцэтгэсэн байна.