Байгаль орчин, аялал жуулчлалын сайд, Орчны бохирдлыг бууруулах үндэсний хорооны дарга Б.Бат-Эрдэнэ өнгөрсөн 2022 оны 5 дугаар сард А/527 тоот тушаал гаргаж Орчны бохирдлыг бууруулах үндэсний хорооны 2022 онд хийж хэрэгжүүлэх арга хэмжээний төлөвлөгөөнд тусгагдсан 29 ажилд шаардагдах 43 тэрбум 671 сая 369 мянга 800 төгрөгийг зарцуулах шийдвэр гаргаж байв.

Энэ хүрээнд өмнөх Төрийн нарийн бичгийн дарга Э.Баттулгад “эрх шилжүүлсэн” байна. Сайдын А/167 тоот тушаалын дагуу Төрийн нарийн бичгийн дарга нь А/423 тоот тушаал гаргаж 13 тэрбум 868 мянган төгрөгийн зарцуулалтын хуваарийг гаргасан байна.

Харамсалтай нь дээрх мөнгөөр аль дүүргийн, хичнээн айлын нүхэн жорлонг шинэчилсэн нь одоо болтол ТОДОРХОЙГҮЙ байгаа юм!! “Гэр хорооллын нүхэн жорлонг шинэчлэх” 1,9 тэрбум төгрөгийн ажил авсан “УЛС ТУЯАРАХ” ХХК-ийн мэдээллийг шүүж үзвэл гадаад худалдаа, барилгын засвар хийх, аялал жуулчлалын чиглэлээр үйл ажиллагаа явуулах эрхтэй 2014 оны 05 сард байгуулагдсан компани юм! Эцсийн өмчлөгч нь Б.Нарангэрэл гэгч эмэгтэй.