Нийслэлийн Засаг дарга бөгөөд Улаанбаатар хотын Захирагч Х.Нямбаатар, Чингэлтэй дүүргийн Засаг дарга Н.Батсүмбэрэл нарын албаныхан өнөөдөр Чингэлтэй дүүргийн 5-р хороонд ажиллаж, эзэмшил газраа зориулалтын дагуу 26 жил ашиглаагүй "Меридиан" ХХК-ийн 900 м.кв газар эзэмших эрхийг цуцалж, газрыг чөлөөллөө.

Тухайн хэсэгт машины зогсоол хангалтгүй байдаг тул дүүргийн Засаг дарга Н.Батсүмбэрэл далд зогсоолтой, ногоон байгууламж болгон тохижуулах саналаа хотын даргад илэрхийлэв.

"Меридиан" ХХК нь 1998 онд тус газрыг хөгжмийн сургуулийн барилгын зориулалтаар эзэмшсэн ч, огт ашиглалгүй хашаалсан байдалтай байсан юм.

Иймд хорооны иргэд удаа дараа тухайн газрыг чөлөөлж, газар эзэмших эрхийг нь цуцлах саналыг нийслэлийн Газар зохион байгуулалтын албанд илэрхийлж байв.