Монгол Улсын Ерөнхий Сайд, УИХ-ын дарга, Монгол Улсын Ерөнхийлөгч хэмээх төрийн гурван өндөрлөгийн албыг хашсан улс төрч одоогоор Монголд түүнээс өөр үгүй. Хүссэн ч, эс хүссэн ч түүхэнд үлдэх энэ улстөрчийн улс төрийн замнал, уналт босолт, тэмцэл, үзэл бодол, үг үйлдэл хийгээд хувийн амьдрал нь одоо ч олон нийтийн анхаарлын төвд байсаар байна.

Намбарын Энхбаяр 1958 оны зургадугаар сарын 1-нд Улаанбаатар хотноо аав Намбар, ээж Бүдханд нарынхаа хүү нь болон мэндэлсэн байдаг. Аав Б.Намбар нь  “Оргил” рашаан сувилалд дарга, Монголын үйлдвэрчний эвлэлийн төв зөвлөлд Амралт рашаан сувилал хариуцсан албан тушаалтан гэх мэт албыг хашиж иржээ. Бүх насаараа рашаан сувиллын чиглэлээр ажиллаж ирсэн түүнийг Балжиннямын гэхээсээ “Рашааны Намбар” л гэлцдэг нь ийм учиртай.

Энхбаяр хүү долоон настайдаа сургуульд орж, 1965-1975 онд 23-р сургуульд сурч төгсөөд 1975-1980 онд Москва хотноо М.Горькийн нэрэмжит Утга-зохиолын дээд сургуулийг Утга-зохиолын ажилтан, орчуулагч мэргэжлээр дүүргэжээ. Горькийн сургуулиас тэрээр ямархан мундаг орчуулагч болж төгсөж ирснийг түүний орчуулсан английн зохиолчдын “Хатсан гар” өгүүллэгийн түүвэр, “Бурхан багшийн сургааль”, “Невийн өргөн чөлөө” зэрэг дэлхийн сонгодог бүтээлийн найман боть нь тод харуулдаг. Энхбаяр 1985-1986 онд Их Британийн Лийдсийн их сургуульд англи хэл, утга зохиолын чиглэлээр суралцаж, МУИС-ийн англи хэлний курс төгсчээ. Түүний ном эрдэмд хичээнгүй нэгэн байсны нэг жишээ гэхэд л бурхан шашнаа буруу хойшоо гэж нүд үзүүрлэсэн социализмын үед дунд сургуульд байхдаа түвд хэл бичиг судалж байсан явдал.