Үүний зэрэгцээ Монгол Улсын Их Хурлын дэд даргаар нэг удаа, УИХ дахь Олонхийн бүлгийн даргаар нэг удаа, Ардчилсан намын даргаар нэг удаа, УИХ-ын гишүүнээр дөрвөн удаа тус тус сонгогдон ажилласан гэхээр бас л нэгэн сонин түүх харагдана. Магадгүй ороо бусгаа цагийн энэхэн орон зай, ирээдүйд ч дахин давтагдахгүй байж мэдэх эл намтар бол түүний амьдарсан цаг хугацааны онцлог байх. Ардчилсан хувьсгалын анхдагч 13-ын нэг, тэрбээр энэ үйл хөдөлгөөнд тэргүүлэх эгнээнд оролцож, тухайн үедээ шийдвэр гаргах түвшинд бүлэг толгойлж байсан гэхэд ч болно. Тэр хэрээр үүнийхээ үр шимийг харамгүй хүртсэн нэгэн.

Харин ардчиллын түүхнээ “Цахиагийн Элбэгдорж нь анхны ардчилсан хөдөлгөөний партизануудын нэг болж амь биеэ хайрлалгүй, хүмүүсийг зохион байгуулж, жагсаал цуглаан хийж, Монголын төр засгийн коммунист дэглэмийг цус урсгалгүйгээр 1989 онд төгсгөл болгоход чухал үүрэг гүйцэтгэсэн юм. Коммунист төр засгийн эсрэг Ц.Элбэгдоржийн гол шүүмжлэл нь ардчилсан нийгэм, үг хэлэх эрх чөлөө, чөлөөт зах зээлийн эдийн засаг Монгол оронд хэрэгтэй гэсэн бөгөөд Монголын коммунист төр засаг эдгээрийг дэмждэггүй байв. Ц.Элбэгдорж болон Монголын коммунизмын эсрэг хувьсгалын удирдагчид, дэмжигчдийн ачаар Монгол Улс төв Ази дахь анхны ардчилсан орон болсон юм.

Олон улсын эрдэмтэн судлаачид болон олон улсын хэвлэл мэдээллийн хэрэгсэл Ц.Элбэгдоржийг “Монголын Томас Жефферсон” гэж АНУ-ын тусгаар тогтнолыг тунхаглагчдын нэг, ардчиллыг үндэслэгч эцэгтэй зүйрлэн нэрлэдэг” хэмээн товойлгож үлдээсэн нь бий.