Ерөнхийлөгч Х.Баттулгын үйл хэргийг олон нийт дүгнэж байгааг харж байна. Тэгвэл ҮАБЗ-ийн тэргүүний хувьд ямар үр дүнтэй ажиллав. Мэдээж, олон нийтэд ил болгох болоогүй олон далд шийдвэр нууцлагдсан. Ард түмнээс сонгогдсон Ерөнхийлөгчийн улс орныхоо төлөө хийсэн, одоо нэгэнт олон нийтэд ил болсон зарим нэг үйл явдлыг дурсамж болгон хүргэе гэж бодлоо. Монгол Улсын Ерөнхийлөгч Х.Баттулга АНУ-д хийж буй айлчлалын хоёрдахь өдөр буюу 2019 оны 8 дугаар сарын 1-ний өдөр. Цагаан ордонд АНУ-ын Ерөнхийлөгчтэй уулзах уулзалтын өдөр. “Four seasons hotel”. Өдрийн 12.00 цагийн орчимд Ерөнхийлөгч дуудаж байна гэв. Би ч хажуугийн өрөөнд ойрхон байсан тул тэр дороо яваад орлоо. Х.Баттулга Ерөнхийлөгч ганцаараа байв. Удахгүй Цагаан ордон руу гарах гээд цаг ч тулсан байв.

 

Х.Баттулга Ерөнхийлөгч хэлэв. “Ерөнхийлөгч Трамптай хийх ярианы сэдэв болж байна аа. Дэлхийн Их гүрний удирдагчтай уулзаж байгаа гэдэг утгаараа түүний зан чанар, онцлогт таарсан чухал сэдэв олж анхаарлыг нь татах, монголчууд ч бас дэлхийн хэмжээний Их гүрэн байсан гэдгийг сануулсан нэг алхам хийе” гэв. Гэнэт ийм асуудал тавьсан тул би тулгамдав. Тэгээд “бодоогүй юм байна” гэж хариулав. Харин Ерөнхийлөгч Х.Баттулга бодсон байжээ. Тэгээд өөрийн бодлоо баталгаажуулж, зөвлөхөөр дуудсан болж таарав.

 

Тэгээд тэрээр ингэж хэлэв. “ОХУ, АНУ асуудалтай байгаа. ОХУ манай мөнхийн хөрш, найрсаг хамтын ажиллагаатай улс. АНУ-тай энэ айлчлалаар стратегийн түншлэл тогтоож байна. Энэ хоёр улсын Ерөнхийлөгч нарыг утсаар яриулах гээд үзэх үү? Яг одоо Сибирьт түймэр гарч байна. Энэ талаар хэлээд үзвэл ямар вэ?” гэв. Миний хувьд ёстой л гайхах шиг болов. “Тийм шүү. Болж байна. Сэдэв нь таарч байна. Байгаль экологийн сэдэв. Үгүй гэхгүй байлгүй. Хэл, хэл” гэв. Ингэж тохироод бид АНУ-ын Ерөнхийлөгч Д.Трамптай уулзахаар гарав. Монгол Улсын Ерөнхийлөгч Х.Баттулгын энэ санаа хэрэгжсэн бөгөөд тэр өдрийн 15.00 цагт АНУ-ын Ерөнхийлөгч Д. Трамп ОХУ-ын Ерөнхийлөгч В.В.Путинтай Сибирийн түймэртэй тэмцэхэд туслах санал тавьж утсаар ярьсныг дэлхий даяар мэдсэн билээ.