"Эгэл амьдрал" нэвтрүүлгийн энэ удаагийн дугаарт "Бүүвэй брэнд"-ийн үүсгэн байгуулагч М.БАДАМРЕНЧИН оролцлоо. Тэрбээр хадны сүг зураг, Хүннүгийн үеийн хаадын тамга, Хүннү гүрний бэлгэ тэмдэг гэх мэт улс орны түүхээс улбаалан санаа авч хонины нэхий, ямааны арьс, модон дээр урладаг онцлогтой.

Анх дүүтэйгээ хамтран энэхүү бизнесээ эхлүүлсэн бөгөөд олбог, аяганы суурь, хөргөгчний наалт, ханын сувинер, машины зүүлт гэх мэт хэд хэдэн бүтээгдэхүүн үйлдвэрлэх болжээ. Гэсэн хэдий ч дүүгийнх нь бяцхан хүү "Ясны идээт үрэвсэл" оноштой болсон бөгөөд одоогоор БНСУ-д эмчлүүлж байна. Сар гарангийн хугацаанд 60 гаруй сая төгрөгийн эмчилгээ хийлгэсэн ч дахин сар хагас эмчлүүлэх хугацаа үлдээд байгаа юм. Энэхүү өвчин нь бүрэн эдгэх боломжтой. Харин хугацаа алдвал илүү хүндрэх эрсдэлтэй юм. Түүний ар гэр, хамаатан садан үлдсэн хугацаанд дахь эмчилгээний төлбөрийг олохоор олноор үйлдвэрлэх боломжтой хөргөгчний наалтанд захиалга авч, шаргуу хөдөлмөрлөсөөр байна.