Даваа гарагийн аймгийн Засаг даргын шуурхай зөвлөгөөнийг Засаг дарга Б.Зоригтбаяр удирдан явуулав.  Шуурхайн эхэнд өнгөрсөн долоо хоногийн үүрэг даалгаврын биелэлт, иргэдийн санал хүсэлтийг хүлээн авах 70353511 дугаарын  утсанд  иргэдээс ирүүлсэн ирсэн санал, хүсэлтийн шийдвэрлэлтийн биелэлт, Хотын захирагчийн алба, Баян-Өндөр, Жаргалант сумын цаг үеийн ажлын мэдээлэл, томуу, томуу төст өвчний эсрэг авч хэрэгжүүлж буй хариу арга хэмжээний талаар  БОЭТ-ийн мэдээлэл хийлээ. 

Үүний дараа аймгийн Засаг дарга Б.Зоригтбаяр   дараах үүрэг даалгаврыг өглөө. 

•  2024-2028 оны Засаг даргын үйл ажиллагааны хөтөлбөрийг батлуулахад бэлтгэж ажлын хэсэг байгуулах. Ажлын хэсэгт холбогдох албаны мэргэжилтнүүдээс гадна мэргэжлийн төлөөллийг оролцуулах, 
•  2025 оны улсын төсвийг  УИХ-аар хэлэлцэж байна. Энэ долоо хоногт эцэслэн  батлагдана. Үүний дараа аймгийн 2025 оны төсвийг батлуулна. Тухайн оны  тавдугаар сарын 31-ээс өмнө худалдан авах ажиллагаа дуусах хуулийн заалттай. Байгууллагуудаас ирсэн саналыг эрэмбэлж, зураг төсвийн ажлыг эрчимжүүлнэ. 
•  Аймгийг хөгжүүлэх 5 жилийн үндсэн чиглэлийг батлуулах ажлын хэсгийг МАН болон АН-ын төлөөлөгчидтэй хамтран байгуулах,
•  2025 онд хийгдэх хөрөнгө оруулалтын ажлыг эрэмбэлж, ирэх долоо  хоногт Засаг даргын зөвлөлийн хурлаар хэлэлцүүлэх,
•  Төрийн албан хаагчид харилцаа хандлагатаа анхаарч ёс зүйтэй байх. Мөн ажлын цагийг баримтлах, үр бүтээлтэй өнгөрүүлэхэд анхаарах,
•  Иргэдээс ирсэн санал гомдлыг газар дээр нь очиж танилцан, шийдвэрлэж, үр дүнг тайлагнаж байхыг бүх байгууллагын удирдлагуудад чиглэл болголоо.