Монгол Улсын сайд, ЗГХЭГ-ын дарга Н.Учрал Дэлхийн шуудангийн холбооны (ДШХ) Ерөнхий захирал Масахико Метокиг өнөөдөр (2024.09.27) Төрийн ордонд хүлээн авч уулзав.

Сайд Н.Учрал Дэлхийн Шуудангийн Холбооны зүгээс Монгол Улсын шуудангийн сүлжээг бэхжүүлэх, алслагдмал бүс нутагт оршин суугаа иргэдийн бүх нийтийн шуудангийн үүргийг хэрэгжүүлэхэд анхаарч, үндэсний оператор Монгол Шуудан ХК-д техник, арга зүй, санхүүгийн дэмжлэг үзүүлж, хамтран ажиллаж ирсэнд талархал илэрхийлэв. Мөн шуудангийн үйлчилгээг иргэдэд цаг алдалгүй, хялбар үзүүлэхэд хаягжилтын нэгдсэн систем чухал болохыг дурдаад Монгол Улсын Засгийн газар олон улсын стандартад нийцсэн хаягжилтын системийг үндэсний хэмжээнд нэвтрүүлэхээр ажиллаж байгааг мэдээлэв.

Ноён Масахико Метоки өргөн уудам газар нутагтай Монгол Улс тархан суугаа хүн амдаа шуудан харилцаа холбооны бүх нийтийн үйлчилгээний үүргийг хэрэгжүүлэхэд онцгой анхаарч, цахим шилжилтийг үр дүнтэй хэрэгжүүлж байгааг сайшааж, цаашид шуудангийн салбарыг чадавхжуулан бэхжүүлэхэд хамтран ажиллахад бэлэн байгаагаа илэрхийлэв.

Монгол Улс нь Дэлхийн шуудангийн холбооны конвенцод 1963 онд нэгдэн орсон бөгөөд өдгөө 61 дэх жилдээ золгож байна.