Манай улсын орон сууцжуулалтын ойрын ирээдүйн бодлогыг хэлэлцэх олон улсын форум 2024 оны 10-р сарын 28-ны өдөр Улаанбаатар хотноо боллоо.

Орон сууцны хүртээмжийг нэмэгдүүлэх, санхүүжилтын бодлогыг оновчтой болгох, орлогод нийцсэн орон сууц, олон улсын туршлагыг нэвтрүүлэх арга зам зэрэг сэдвээр оролцогчид хэлэлцэв.

Хот байгуулалт, барилга, орон сууцжуулалтын сайд Ж.Батсуурь хэлсэн үгэндээ “Ипотекийн санхүүжилтийн эх үүсвэрийг 2025 онд 1.2 их наяд төгрөгт хүргэх бөгөөд жил бүр тус эх үүсвэрийг үе шаттайгаар нэмэгдүүлж, 2028 онгэхэд 60 мянган айл өрхийг ипотекийн зээлд хамруулна.

Мөн ипотекийн зээлийн 50-иас дээш хувийг орон нутагт олгохоор төлөвлөж байна. Ирэх 4 жилд 150 мянган айлын орон сууцыг ашиглалтад оруулна.

“Монголын Ногоон Санхүүгийн Корпораци”-тай хамтран олон улсын санхүүгийн эх үүсвэрээс хөрөнгө оруулалт босгож, амины орон сууцаадулааны алдагдалгүй болгосон иргэдэд хөнгөлөлттэй зээлийг олгох, дэд бүтцээ бүрэн шийдвэрлэсэн өрхөд төрөөс 30 хүртэлх сая төгрөгийн дэмжлэг үзүүлэх эрх зүйн орчныг бүрдүүлнэ” гэлээ.

Монгол Улсын Засгийн газар 2024-2028 оны үйл ажиллагааны хөтөлбөртөө иргэдийг орон сууцжуулах тодорхой зорилтуудыг тусгасан.

Эдгээр нь:

• Үндэсний баялагийн сангаар дамжуулан орлогод нийцсэн орон сууцны нийлүүлэлтийг нэмэгдүүлэх;

• Ипотекийн зээлийг өрхийн орлогын түвшинтэй уялдуулах;

• Үндэсний орон сууцны корпораци байгуулж, орон сууцжуулах арга хэмжээг хэрэгжүүлэх;

• Зорилтот бүлгийн иргэдэд чиглэсэн түрээсийн орон сууцны хөтөлбөрийг хэрэгжүүлэх;

• Байгаль орчинд ээлтэй, эрчим хүчний хэмнэлттэй, амины орон сууцыг нэмэгдүүлэхэд хөнгөлөлттэй зээл, урамшуулалын механизмийг нэвтрүүлэх;

• Улаанбаатар хотын төвлөрлийг сааруулах зорилгоор “Шинэ зуунмод”, “Шинэ Хархорум” зэрэг хотуудыг шинээр байгуулах;

• Аймаг, сум, орон нутагт орон сууцжуулалтын үйл ажиллагааг бодлогоор дэмжих зэрэг болно.

Улсын Их Хурлын намрын чуулганаар Барилгын тухай хуулийн шинэчилсэн найруулгын төсөл, Хот байгуулалтын тухай хуулийн шинэчилсэн найруулгын төсөл болон Үндэсний орон сууцжуулалтын тухай анхдагч хуулийн төсөл зэрэг Барилгын салбарын багц хуулийн төслүүдийг боловсруулан, өргөн барьж, батлуулахаар ажиллаж байгааг бодлого боловсруулагчид хэлж байна.

“Монголын орон сууцжуулалтын ирээдүй” олон улсын форумыг Хот байгуулалт, барилга, орон сууцжуулалтын яам, Гэр бүл, хөдөлмөр нийгмийн хамгааллын яам болон Дэлхийн банктай хамтран зохион байгуулж хот төлөвлөлт, орон сууцны бодлогыг хэрэгжүүлэгчид, олон улсын байгууллагын төлөөлөл, банк санхүүгийн салбарынхан оролцож байна.

Гэр бүл хөдөлмөр нийгмийн хамгааллын сайд Л.Энх-Амгалан, Дэлхийн банкны орон сууцжуулалтын ахлах мэргэжилтэн Дао Харрисон, Дэлхийн банкны санхүүгийн салбарын ахлах мэргэжилтэн Оливье Видал, Дэлхийн банкны хот төлөвлөлт хариуцсан мэргэжилтэн Палави Сенгупта, Египетийн түрээсийн орон сууц, Ипотекийн санхүүжилтийн сангийн Ерөнхийлөгч Мэй Абдель Хамид Ахмед, Хот байгуулалт барилга, орон сууцжуулалтын яамны Орон сууцжуулалтын хэлтсийн дарга Э.Батболд болон Монголын ногоон барилгын сангийн гүйцэтгэх захирал Ц.Батгэрэл нар илтгэл тавьж хэлэлцүүллээ.