ДЭЛХИЙН ДУУРИЙН УРЛАГТ ДАРХЛАГДСАН АЛТАН ХООЛОЙТ Э.АМАРТҮВШИН

Дуурийн урлагийн эх орон Италид хамгийн олон удаа уригдаж, дуулсан Монголын цор ганц уран бүтээлч бол Монголын Дуурийн театрын баритон дуучин Энхбатын Амартүвшин юм. 1986 оны 3-р сарын 23-нд Сүхбаатар аймагт төрсөн. Түүний өвөг эцэг Монгол Улсын манлай уяач А.УХНА гуа юм. Тэрээр багын ичимхий хүүхэд байсан учир ганцаараа хонь хариулж явахдаа шавайгаа ханатал дуулчихдаг хүү байжээ. Дунд сургуулийн 9-р ангидаа “Дуулахуй” хэмээх уралдаанд орон, СУИС-ийн дуулаачийн ангийн урилгатай ирж, аравдугаар анги төгсөх жилээ тайлан тоглолтоо хийн Ц.Ерөө багшийн шавь болсноор түүний дэлхийн дуучин болох замнал эхэлсэн түүхтэй. 2016 оны 5-р сард анхны бие даасан "Энхбатын Амартүвшин" тоглолт хийж байсан. Удалгүй дуурийн эх орон итали руу явж 26 насандаа Риголеттод дуулж ур чадвараа гайхуулсан юм. Учир нь Риголеттод 40 нас гарж, хоолой сууж бүх юм нь жигдэрсэн үедээ дуулдаг гэж үздэг бичигдээгүй дүрэм бий. Дуурийн урлагийн олон улсын нэр хүндтэй “Opera World” цахим хуудаснаас гаргасан 2024 оны жагсаалтаар Монгол Улсын Ардын жүжигчин, Соёлын элч Э.Амартүвшин дэлхийн шилдэг баритон дуучнаар шалгарлаа.Тэрбээр 52 долоо хоногийн турш дэлхийн томоохон тайзууд дээр дуулж, 5900 оноогоор жагсаалтыг тэргүүлсэн бахдам амжилтыг үзүүлж дэлхийд дархлагдсан дуучин гэдгээ дахин баталлаа. Одоогоор Испанийн нийслэл Мадрид хотын театрт дуулж үзээгүй бөгөөд бусад театруудад бүгдэд нь дуулсан тэрээр дуурийн тайзнаасаа буугаад Монголдоо ирж малчин болно хэмээн хэвлэлд өгсөн ярилцлагадаа дурдсан юм. МОНГОЛ түмний бахархалт алтан хоолойт дуучиндаа дахин баяр хүргэе