Ерөнхий боловсролын сургуулийн 2019-2020 оны хичээлийн жилийн төгсөх 12 дугаар ангийн сурагчдыг сургууль төгсөх болон их дээд сургуульд элсэх элсэлтийн ерөнхий шалгалтын бэлтгэлийг эрчимжүүлэх зорилгоор аймгийн Хүүхдийн төлөө зөвлөлийн дарга бөгөөд Засаг дарга М.Бадамсүрэнгийн дэмжлэгтэйгээр аймаг, орон нутгийн төсвийн хөрөнгө оруулалтаар Хэрлэн сумын 12 жилийн сургалттай ерөнхий боловсролын сургуулиудад 70 ширхэг таблетийг, математикийн хичээлийн аппликейшний хамт хүлээлгэн өглөө.

Энэ үеэр аймгийн Хүүхдийн төлөө зөвлөлийн дарга бөгөөд Засаг дарга М.Бадамсүрэн: "Бид бүхний дэвшүүлж буй зорилт нь аль ч салбарт технологийн дэвшлийг нэвтрүүлэх улмаар багш сурагчдын механик ажилд зарцуулж буй цаг хугацааг хөнгөвчлөх талаар арга хэмжээ авч хэрэгжүүлж байна. Энэ хүрээнд дараах таблетийг апликейшний хамт та бүхэнд хүлээлгэн өгч байгаадаа баяртай байна. Мөн зөвхөн эрүүл мэндийн салбар, боловсролын салбар гэхгүй бүхий л салбарт орчин үеийн хөгжил дэвшилтэй хөл нийлүүлж дэвшилтэд технологийг үйл ажиллагаандаа нэвтрүүлэх чиглэлээр ажиллах болно." гэдгийг онцлон хэлсэн юм.

Уг таблетийг ашигласнаар сурагчид 3-12 дугаар ангийн математикийн сургалтын хөтөлбөрийн агуулгын дагуу сургалтад хамрагдах боломжтой. Мөн 70 таблетийг дагалдан энэ оны 1-6 дугаар сар хүртэл ашиглах боломжтой Suraad аппликейшний хамт олгосон бөгөөд “Сураад”-ХХК-ийн зүгээс нийт 360 эрхийг 1 сарын хугацаатайгаар ахлах ангийн сурагчдад үнэгүй олгохоор болжээ.

Энэхүү үйл ажиллагаанд аймгийн Засаг дарга М.Бадамсүрэн, аймгийн Засаг даргын Тамгын газрын Нийгмийн бодлогын хэлтсийн дарга О.Байгалмаа, Боловсрол, соёл урлагийн газрын дарга А.Нансалмаа болон сургуулийн удирдлагууд, сурагчид оролцов.