Алдарт эхийн одон олгодог журам нь зарим эхчүүдэд хүндрэл учруулж, босгыг нь давахад асуудалтай байсан аж. Энэ журмыг өөрчлөхгүй болохгүй байгаа талаар өнгөрсөн жил Улсын Аварга О.Хангай асуудал хөндөж байсан юм. Тэрбээр "Эхнэрийн маань ганц арын хаалгагүй авдаг одонгоо авч чадахгүй байна. Олон материал бүрдүүлсэн ч болохгүй байна" гэх утгатай сэтгэгдлийг өөрийн цахим хяагтаа үлдээж, Олон хүүхэд төрүүлж өсгөсөн эхийг урамшуулах тухай хуульд нэмэлт өөрчлөлт оруулах талаар өөрийн цахим хуудаст болон Ерөнхийлөгчийн тамгын газарт хүсэлт гаргаж саналаа илэрхийлж байсан удаатай билээ.

Тус саналыг олон хүн дэмжиж, хуульд өөрчлөлт оруулах хүсэлт илэрхийлж байсан. Тэгвэл энэ сарын 6-нд тус хуульд нэмэлт өөрчлөлт орж, Алдарт эхийн одонгоор шагнах журмын 2.3.2 дахь хэсэгт “Эх хүсэлт гаргасан бол нэг ба түүнээс дээш настай нас барсан хүүхдийг Алдарт эхийн одонгоор шагнах хүүхдийн тоонд хамруулж болно” гэжээ.

Ийн өөрчлөлт оруулснаар хүүхэд нь нэг нас хүрээд нас барсан ээжүүд Алдарт эхийн одонгоор шагнуулах материалаа харьяа сум дүүрэг, хороондоо өгөх боломжтой болжээ.

Олон ээжүүд энэ өөрчлөлт зүйтэй гэдгийг дэмжсэн байна.